終於試到聞名榴槤冰既 真味道! - 聰嫂 (將軍澳)

其實上次都已經係銅鑼灣食過呢個榴槤冰，不過試完又覺得無網上ｄ人講到咁好味，都唔諗住介紹。咁今次又post ?!

本身我入黎將軍澳係想食返碗龍眼椰果冰既，但今日我入到店，聞到好大陣榴槤味，真係爭扎左好耐，又有ｄ唔明點解身邊幾位朋友都話「唔好味咩? 聰嫂d榴槤冰好正wo!」，爭扎左分鐘，我決定俾多次機會你！

榴槤水晶冰
以外份量睇都多過銅鑼灣店，d水晶珠又夠多，急不及待試啖先，　WOW～同上次真係好唔同！ｄ味濃郁好多，唔係好似上次咁得ｄ冰加水晶珠。

我再細睇，原來係今次ｄ冰入面有埋榴槤肉！！！同龍眼冰一樣，啖啖肉，啖啖榴槤香，令我下次黎都想食返榴槤冰！

係因為店唔同所以ｄ餡唔同？定係今期榴槤來貨靚呢　我就唔知喇～　
但大家可以考慮下次到店入面，如果聞到陣陣榴槤味，點呢個榴槤水晶冰肯定係不二之選。 B-)

好味指數: ５粒星★(推介!)






蜜瓜西米露
上一次環顧四週，見唔少人點左呢個蜜瓜西米露～今次就試埋呢隻。

味道相比起上次士多啤梨西米露討好，但味道一樣似假。奶味比較重，食食下有ｄ似韓國蜜瓜雪條果隻味，唔通真係蜜瓜雪糕打出黎既？！因為全碗都係冰既關係，食食下有d寡，not my cup of tea～ 如果係蜜瓜/蜜瓜雪糕fans，又不防一試～因為個名真係好似韓國蜜瓜雪條果隻味

好味指數: 1.5粒星★

只係我個人以後黎到聰嫂都係點返招牌龍眼冰 或榴連冰就最開心。

店舖賣點: 龍眼椰果冰 , 榴槤水晶冰

評分(十分滿分)
味道: 9分
低食值: 9分  (出面乜記乜乜山既糖水閒閒地都要$35以上, 所以呢間值9分)

店舖資料:
名稱: 聰嫂私房甜品
地址: 
分店1) 將軍澳厚德邨C西翼G3-G4舖  
分店2) 將軍澳運亨路1號新都城第一期地下G28舖
人均消費: $18 - $50

朱古力迷必試! - Awfully Chocolate

呢排趕Project 真係趕得快甩車鹿  

呢個晚上有佢陪住，心情愉快d~ 功課都做得快d~

Awfully Chocolate係從我好友口中得知呢間好出名

佢係以朱古力蛋糕打響名堂既店

我就試左呢兩隻市面上都有得買佢既Snack

黑朱古力爆谷  $23~25

佢係用黑朱古力包住既爆谷，黑朱古力甘苦少甜，爆谷好香濃，又脆脆地，細細粒唔太甜，好易密密食，食唔停!! :P

咪睇佢得果80g，入面d豆豆幾輕身，所以份量都唔少粒

唔錯唔錯!

朱古力曲奇 $23~25

一拆開袋, 你就會聞朱古力混合牛油的氣息慢慢飄出來

餅身屬於少許干果種，所以質感少少硬身
重點＊少左曲奇既油膩感，俾我感覺好健康，攞完隻手都唔會有油

食慣了勁鬆化版本的牛油曲奇，可能會有些小小唔慣

但我就好鐘意呢個口感~ 因為佢ｄ朱古力粒 入口會化開，加埋用朱古力整埋既餅 堅香濃~~唔係講笑





評分(10分滿分)
味道: 10分
低食值: 8分

店舖資料:
地址: 1) 各OK大便利店有售
人均消費: $23~25

家庭feel菜飯 - 華姐清湯腩 (天后)

華姐清湯腩

今次呢! 就行經天后個邊!

咁我係到開得post就咁係同食評有關啦。

經過地膽既介紹，我就去左試下睇下佢有咩特別。

咁個地膽就介紹我一定要去華姐清湯腩食牛腩啦(廢話)，

同埋佢極力推介我一定要食蘿蔔同埋個菜飯。

 先講個蘿蔔先，碗蘿蔔十幾蚊都幾大份，

食落口好清甜不過覺得有D硬(可能我鍾意比林D既)。

仲有D蘿蔔食落口有渣既，所以我並唔推薦比大家食。

好啦，到菜飯賣相普普通通，不過食落口一D都唔似出面個D油油膩膩咁，

一D都唔油膩仲好香白菜味。












到主菜清湯腩，個腩就好煙韌同爽口好正，不過略為清淡(呢個係清湯腩黎o個wo)


老老實實我真係幾鍾意呢個清湯腩，特別係個菜飯啊! 大家可以試下。

店舖賣點: 清湯腩、菜飯

評分(十分滿分)

味道: 7分

低食值: 6分

店舖資料:

名稱: 華姐清湯腩

地址: 天后電氣道13號A地下

人均消費: $25-$50

鱈魚片の高層次食法

是咁的。 

鱈魚片唔食脆ge 同  登上白雲山唔食山水豆腐花係無分別

自問對食有要求既你唔好再錯落去啦喇

識食既你 知點揀啦～

改正錯誤請按>>>> Youtube Link




****注意事項**** 焗爐做到同樣效果 灘涼會更加脆 :p

至「真」味道既果汁

最Good既Ｍorning 由新鮮果汁開始 *v*

市面上賣緊既果汁黎講　我試過好幾間，但好味呢？就暫時只得呢一隻～　
無論係Market Place , Ikea, 7-11, OK, 惠康賣緊果幾個Brand 既果汁，但都唔及呢隻好飲~! 
就係 Fresh喇

呢隻士多啤梨同 雜莓都好飲~ 有完熟草莓既香，而且飲得出個水果既天然甜味～飲得出無加糖份～　

真心推介 俾d鐘意水果 / 喜歡既人買黎試試~    

******Tips******

你見市面上賣既果汁包裝都好鬼似樣，本人都中過幾次伏～＿～ 所以要小心唔好買錯~

所謂既中伏，係果汁唔夠濃，又唔夠果香，而且有ｄ仲要加左糖，唔夠100%天然。

地址: 各大TASTE / 百佳超市有售消費: $10-13 左右 

點樣向情人顯示少少心思?! (有Video教學)

快速愛心流芝三文治 <3

快速Video教學歡迎到>>> Youtube 快速教學版

預先要準備

方包       1塊  (*建議用厚身&大size方包，可放更多餡料&芝士)

芝士　   1-2塊，隨你喜好 (*放在室溫10分鐘，得煮既時候會易d溶^^)

自己喜好既餡料　隨意少量　(*已整熟) *我自己建議用蘑菇/煙肉/火腿/ 最好味:P*

1) 將方包小心地切開個入面，淨返個麵包框，可以係心形、正方形/其他形狀都得~
    (tip*     (tip*整大d個洞可以放多d餡落去:p)

2) 開最細既火，然後落少少油係煎pan到，待熱，先放麵包，再打隻雞蛋落個麵包框入面～

3) 將餡料(已滾熟)平均放在雞蛋上面 (份量隨意,Maximum只可高過麵包厚度少少)

4) 落芝士 (如果係芝士fans就建議餡料落少d，芝士多d)

5) 將最初cut左出黎既麵包放返上去，用少少力去壓一壓實入面d餡

6) 然後小心翼翼地將成塊麵包反轉烘一烘佢，完成。

TIPS

***成個過程要快手，因為用火烘太耐　麵包框會偏乾。

***如果安全d就可以先查牛油在麵包框其中一面，將查左牛油既麵包框果面 面向煎pan。

出名雞蛋仔之其實格仔餅先好味 - 蛋記(西灣河)

最近大把功課成日都趕唔切反屋企食飯，屋企既儲糧成日都缺貨，銀包搵張紅色既睇下都無，好彩仲有太安樓呢個人傑地靈既福地

一出地鐵站，過個馬路，立即索索個度既靈氣（油煙）就好似陶潛 複行數十步，豁然開朗。


第一站當然係我既首選 - 蛋記



有好多人都話蛋記既雞蛋仔，佢地既雞蛋仔連呀蘇（蘇施黃）都介绍過。

但係有幾個人知道，佢既格餅先係王道～！

我第一次食既時候我都仲係隻小學雞，蛋記都仲未有鋪名，老細個仔都未出黎幫手，價錢仲講緊幾蚊就買到~

唯一欣慰既係佢噤多年不變既味道

由我第一啖咬落去，個種脆口，花生醬，煉奶，布满成個嘴既感覺，顛覆左格餅軟林林既印象

其實格餅(認真…) 蛋記都無令我失望過

利申：要叫多醬！

至於你問我點解唔試雞蛋仔？！　

係因為隨住時間依家鋪頭已經無用炭爐去燒雞蛋仔，而且蛋味淡，已經無哂雞蛋仔最重要既靈魂，硬脆得個餡都無味，$12 唔值食。

希望佢地再再改良，回復以前大排長龍既光彩。

食物推介: 格仔餅 

評分(10分滿分)
味道: 7分
低食值: 7.5分  

店舖資料:
名稱: 蛋記
地址: 西灣河筲箕灣道57-87號太安樓地下A3B舖
人均消費: $20以下

鬧市中休閒的一角 - HeSheEat (旺角)

約左個fd去旺角傾計，除左老麥同上樓cafe，到底仲有d咩野選擇呢？！係我仲係到沉思既時候，朋友就帶左我呢間 HeSheEat。

HeSheEat 位於旺角白布街，距離行人專用區或波鞋街一帶步行約十分鐘

  

佢係一間兩層既cafe，

最近先開張，上至老細，下至chief同waiter清一色係後生仔女

supposed係呢到應該要啜個咖啡，但係係Econ 既角度係應該以有限既資源去换取最大既满足感，所以我一睇到佢既栗子蛋糕我就Feel 到個澎湃desire

栗子蛋糕

上層係好smooth 栗子忌廉

下層係meringue同脆脆餅底，再加一個雲呢拿雪糕

Bravo !  我係覺得栗子蛋糕贏在囉

檸檬忌廉班戟卷(配焦糖脆脆和乳酪雪葩)　

朋友就覺得好好食，

班戟皮中間包著酸酸甜甜的檸檬吉士醬，中和了淋面的焦糖醬和焦糖脆脆，而乳酪雪葩令整件甜點變得清新，味道酸酸的，唯班戟皮唔夠蛋香，整體味道都幾夾，係ok。

另一位友人點左個baileys梳乎里

焗得十分挺身，軟綿綿的質感，讚一讚食到最尾唔會塌哂，而梳乎厘甜度較低，係一般人能夠接受的甜度。不過baileys味唔突出，只吃得出蛋香味。如果baileys可以下重手d，相信會正好多。

總括來說，HeSheEat整體味道是可以的，但是位置並不就腳，而份量真係細左d，定價偏高，二人同行最少消費過百元，唔係話太值。

所以整體評分為中等，唔怕貴同唔抱太大期望應該會食得開心d。：）

評分(10分滿分)

味道: 7分
低食值: 4分  
 
店舖資料:
名稱:  HeSheEat
地址:  旺角白布街22號藝興大廈地下4號舖
人均消費: $55~

$3.8 就買到出名蛋撻~ 截至今日咋~!

雖然以原價$5買算係中規中矩，但$3.8有好質素既蛋撻就的確抵食~！

經過泰昌不防買黎試試；）



既然介紹優惠，我都簡單介紹下D蛋撻先～

蛋撻 (原價$5，優惠後$3.8)

呢次買因為剛出爐既關係，蛋餡入口還是溫熱的，細嫩程度近燉蛋既口感，而特別之處是跟那些只用吉士粉溝出來、色而無味的街外雞蛋攤不同，有蛋香～而且餡甜度適中。
而蛋撻皮是用曲奇做成的，撻皮底部夠挺實，沒有被沾濕既感覺，帶著頗重的牛油香，香酥鬆脆。








閒時當小食的不錯選擇


港九新界分店可到以下網址查詢：
http://www.taoheung.com.hk/tc/brands/tai_cheong_bakery/index_p_2.html




按圖放大>>>

女孩子都為之瘋狂 － 茶木 (旺角)

茶木　－　相信呢間去開旺角既朋友都應該聽過呢間野，但至於有咩係好食架呢？我就食過幾次喇~ 等我話你知喇 ;)

而且如果同女仕朋友去開旺角，無ideas去邊間食?! 　不防帶佢黎呢間　實無死之選~ B-)

（不過大前題>> 唔鐘意食面包既人只會覺得好普通）

招牌 - 草莓香草蜜糖磚塊 

這磚塊內埋藏了很多小方塊的蜜糖多士粒粒，非常香脆，至於那面包有烘烤過，較為脆身，沾上雪糕同吃也滋味。 
但是這份甜品對於２個女生來說實在是太多了，若果是三至四人共享，是較適合。

而芒果味蜜糖磚塊，我同友人都覺得與草莓相比的 味道稍為遜色~ 

<<<反而呢個 脆皮草莓心太軟磚塊 無上圖咁好食~  


入面無得好少 多士粒粒, 而且好少密糖，　而外層面包無加以烘焗，有點似食緊面包皮，略嚴太硬。





鐘意面包的，應該試上圖果個～佢地個樣/名亦都好似，小心點錯~ :s















另外，如果想呢度食飯，有幾個飯都想推介架~　反而麵就有d 中伏 唔多好食，唔建議試~

魯肉飯


魯肉飯熱辣辣好好味，味道適中，唔會太咸。裡面隻半熟蛋都好味，唔會有陣壓味

酥炸豬排肉燥飯

這豬排是即炸的，炸漿不算厚，豬排幾鬆化，味道OK

三杯雞

三杯雞意思是一杯酒，一杯水和一杯油，，酒味道很出，很香口，雞很入味，的確很不錯。

鹽酥雞

其實都ok~　個人覺得食多幾舊就鹹左少少，如果多幾朋友去食就份量岩岩好喇～

飲品 >>>>>>>>>>

水果茶

味道酸酸地，有話梅、蘋果、橙……
入口味道也還不錯，但如果同真正台灣的咖啡弄比較的話，難免會比下去，水果量亦不如台灣咖啡弄的多。




巨蜂提子乳酸梳打
友人覺得還不錯　



反而蔓越梅冰，沙冰類似糖槳打成，味道偏甜，不建議。

這裡服務一般，哎左幾次先有人得閒加水，但環境休閒舒適，拉返少少分，價錢中等，唯夜市要預留時間等位，所以怕等建議選擇其他。

食物推介: 脆皮草莓心太軟磚塊, 水果茶, 三杯雞

評分(10分滿分)
味道: 7分
低食值: 6分  

店舖資料:
名稱: 茶木
地址: 
總店:  旺角彌敦道628號瓊華中心10樓全層
分店:  銅鑼灣軒尼詩道489號銅鑼灣廣場一期6樓A舖
            尖沙咀加拿芬道20號加拿芬廣場2樓
人均消費: $50 - $100